التخطي إلى المحتوى

 

العلاقات بين الزوايا | الزاويتان المتقابلتان بالراس والزوايا المتجمعة حول نقطة | اولي اعدادي | هندسة |

معانا انهاردة درس العلاقات بين الزوايا واللي دايما بحب اقسمه الي ثلاث اجزاء :
الجزء الاول : الزاويتان المتجاورتان ( المتتامتان والمتكاملتان ) اضغط هنا هتلاقيه
الجزء الثاني : الزاويتان المتقابلتان بالرأس والزوايا المتجمعة حول نقطة واحدة .. ودة اللي هنشتغل عليه دلوقتي.
الجزء الثالث : منصف الزاوية ودة الموضوع الجاي – إن شاء الله –

هنشتغل دلوقتي علي الزاويتان المتقابلتان بالرأس والزوايا المتجمعة حول نقطة :
أولا : الزاويتان المتقابليتان بالرأس :
مين همة الزوايا دي ؟ دول الزوايا الناتجة عن تقاطع مستقيمين .. حيث ينتج اربع زوايا .. كل زاويتين متقابلتين متساويتين (يعني كل زاويتين في وش بعض قد بعض )
* ودة معناه انه لو مطلوب منك تجيب زاوية .. هتحاول بكل الطرق تجيب الزاوية اللي في وشها الاول وبعد كدة تقول ان الزاوية بتاعتنا اللي احنا عايزينها هتساوي الزاوية اللي في وشها ( بالتقابل بالرأس )
* ولو عندي ( نجمتين ) يعني زاويتين متساويتين .. هستغل المعلومة دي وانا بحل المسألة
* ولو عندي زاوية مستقيمة معطي جزء منها .. هستغل برده المعلومة دي علشان اجيب باقي الزاوية واقول( 180- الرقم اللي عندي ) ودة هيساعدك كتير توصل للحل .. ودة اللي احنا اخدناه قبل كدة باسم ( الزاويتين المتكاملتين )


ثانيا : الزوايا المتجمعة حول نقطة :
* لازم تعرف ان مجموع قياسات الزوايا المتجمعة حول نقطة واحدة = 360 ْ
* وساعتها هيديك كل الزوايا الا الزاوية اللي بيسألك عليها .. وهنا هنقوله 360 – ( وتجمع كل الزوايا المتبقية ) = الزاوية اللي بيسألك عليها .
* او يجيبلك مسألة ناقص منها زاويتين وهوة عايز زاوية واحدة .. بس الزاويتين عليهم نجمتين ( يعني الزاويتين متساويتين ) وساعتها هتقوله 360- ( وتجمع كل الزوايا المتبقية ) = الزاويتين مع بعض ،، وبعد كدة هتقسمهم ÷2 علشان تجيب قياس كل زاوية فيهم .

شوية حاجات لازم تعرفها وانت شغال :
1- اول حاجة بتجري تعملها في المسألة .. انك تحدد فين الزاوية اللي بيسألك عليها ، وافتكر دايما اننا بنقرأ الزاوية ( برة – جوة – برة ) هتحددها وتعمل عليها ( علامة استفهام ؟ )
2- هتحاول تستغل كل معلومة موجودة في المسألة .. واعرف ان كل معلومة هتوصلك لمعلومة جديدة
3- لو كانت المسألة جوة مثلث . لازم تعرف ان مجموع قياسات زوايا المثلث 180 ْ
4- ولو المسألة فيها خطين مستقيمين تقل عليهم بالقلم والمسطرة علشان تشوفهم وتقدر تطلع منهم الزاويتين المتقابلتان بالرأس وتخليهم متساويين.
5- لو عندك خط مستقيم واحد في المسألة اعرف انك هتستغل فكرة ( ان الزواية المستقيمة قياسها 180ْ ، هيديك منها جزء فانت هتطرح علشان تجيب الجزء الباقي ) .
6- لازم تتفرج علي الهندسة وهية بتتحل قدامك خطوة بخطوة .. علشان كدة فضي نفسك وركز كويس واتفرج علي الدرس كله .. هتلاقيه هنا

وبعد ما خلصت الدرس هتجهز ورقة وقلم وآلتك الحاسبة علشان تقعد معايا وتحل الامتحان الجاي بتركيز

وبعد ما هتحل الامتحان هتنزل تصحح لنفسك من نموذج الاجابة وتتطمن انك ماشي صح .. الدرجة الاجمالية للامتحان ( 15 درجة ) حيث ان كل سؤال عليه 3 درجات .. يلا بينا

وبكدة يبقي خلص الدرس متنساش .. تذاكر ( الزاويتان المتتامتان والمتكاملتان )
وتذاكر( درس المفاهيم هندسية )
وتذاكر ( منصف الزاوية ) لما ينزل
هذا وما كان من توفيق فمن الله ، وما كان من خطأ او ذلل او نسيان فمني ومن الشيطان 
واوصيكم بأولادكم خيرا .. والسلام عليكم ورحمة الله بركاته

 

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *